އަޅުގަނޑުމެންގެ މަޤްޞަދަކީ ، ދިވެހި ދަނޑުވެރިންގެ އުފެއްދުންތަކަށް އެކަށީގެންވާ އަގެއް ލިބޭނެކަމުގެ ޔަޤީންކަންދިނުމާއެކު ، އެތަކެތީގެ އަގު ، ލަސްނުކޮށް އަދާކުރުމެވެ. މިހާރު ، ކުރަމުން އަންނަ ދަނޑުވެރިކަމުގެ ވަށްޓަފާޅި ، ވިޔަފާރި އުޞޫލަށް ފައްތައިގެން ، ދާއިމީގޮތަކަށް އާމްދަނީ ލިބިލިބި ހުންނަ މަސައްކަތަކަށް ބަދަލުވުމުން ، ދަނޑުވެރިކަމުގެ އުފެއްދުންތަކަށް ހަމައަގުލިބި ، ގެއްލުން ކުޑަވުމާއެކު ، އުކާލަންޖެހޭ މިންވަރު މަދުވެގެންދާނެއެވެ.

ސަރަޙައްދީ އަދި ރަށު ކޯޑިނޭޓަރުންނާއި ، ގުޅުންހުރި ފަރާތްތަކުގެ ވިއުގައިގެ ތެރެއިން ، ދަނޑުވެރިކަމުގެ އުފެއްދުންތައް މާރކެޓަށް ފޯރުކޮށްދިނުމަށް ، އަޅުގަނޑުމެން މަސައްކަތް ކުރާނަމުއެވެ. ރާއްޖެ އުފެދިފައި އޮތްގޮތުން ، މުދައު އުފުލައި ގެންގުޅުމުގައި ، ސަޕްލައިކުރާ ފަރާތްތަކަށް ކުރިމަތިވާ ދަތުރުފަތުރާއި އެހެނިހެން ދަތިތައް ޙައްލުކޮށްދިނުމަށް ، އަޅުގަނޑުމެން މަސައްކަތް ކުރާނަމުއެވެ.ދަނޑުވެރިންނަށް މާކެޓްގެ މައުލޫމާތު ފޯރުކޮށްދިނުމާއި މާކެޓް އިންފްރާސްޓްރަކްޗަރ ރަނގަޅުކޮށްދޭން މަސައްކަތް ކުރެވޭނެއެވެ.

ދަނޑުވެރިންގެ އުފެއްދުމުގެ ޤާބިލުކަން ތަރައްޤީކުރުމަކީ ދަނޑުވެރިކަމުގެ އުފެއްދުންތެރިކަން އިތުރުކުރުމާއި ދެމެހެއްޓެނިވި ދަނޑުވެރިކަން ކުރިއެރުވުމަށް ވަރަށް މުހިންމު ކަމެކެވެ.އެހެންކަމުން ދަނޑުވެރިންނަށް ބޭނުންވާ ތަމްރީނާއި ފަންނީ އެހީތެރިކަން ފޯރުކޮށްދެވޭނެއެވެ.ދަންޑުވެރިކަމުގެ ޓެކްނޮލޮޖީތައް ތައާރަފްކުރުމަށް އެހީތެރިވެ ތަފާތު ދިރާސާތަކާއި ސިނާޔަތް ކުރިއެރުވުމަށް އެހީވެދޭނެއެވެ.އަޅުގަނޑުމެން ސަޕްލައި ކުރާ ފަރާތްތަކާއި ރީޓެއިލް ފިހާރަތައް ފަދަ ހޯލްސޭލް ގަންނަ ފަރާތްތަކަށް ލޯކަލް އުފެއްދުންތައް ލިބޭނެ މަގު ތަނަވަސްކޮށްދޭނަމެވެ.