29 December 2024
Mohamed Shaarif Hassan Saabig
ނޫސްބަޔާން
އެގްރޯނެޝަނަލް ކޯޕަރޭޝަން ޕްރައިވެޓް ލިމިޓެޑް ( އެގްރޯނެޓް ) އުވާލައްވައި ، އެކުންފުނިން ކުރަމުން އައި މަސައްކަތްތައް ، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލު ކުރެއްވުމަށް ، ދައުލަތުން ނިންމެވުމާ ގުޅިގެން ، އެކަން ހަމަޖެއްސުމަށްޓަކައި ކުރަންޖެހޭ މަސައްކަތްތައް ، އެގްރޯނެޓްގެ ޕޭރަންޓް ކުންފުނިކަމުގައިވާ ، މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑްގެ ލަފާގެމަތިން ، މިއަންނަނީ ކުރަމުންނެވެ.
ކަންމިހެން އޮތްއިރު ، އެގްރޯނެޓްގެ އިސް ދެމުއައްޒަފެއްގެ ބައިވެރިވުމާއެކީ ، އެގްރޯނެޓާ ބެހޭގޮތުން ޙަޤީޤަތާ ޚިލާފު ، ދޮގުމަޢުލޫމާތުތަކެއް އޮންލައިން ދެނޫހެއްކަމުގައިވާ " މިލައުތުރު " އަދި " ހީރަސް ނިއުސް " ގައި ފަތުރަމުން އެބަގެންދެއެވެ. އެ ދެނޫހުގައި މިކުންފުންޏާ ބެހޭގޮތުން ގެނެސްދީފީފައިވާ މަޢުލޫމާތަކީ ، އެއީ ޞައްޙަ މަޢުލޫމާތެއްތޯ ، މިކުންފުނީގެ އެއްވެސް މަސްދަރަކުން ސާފުކޮށްފައެއް ނުވެއެވެ. ނޫސްވެރިކަމުގެ މިނިވަންކަމަކީ ، ދިވެހިޖުމްހޫރިއްޔާގެ ޤާނޫނުއަސާސީއާ ޚިލާފަށް ، ވަކިބަޔަކު ބޭނުންވާ ގޮތަކަށް ، އެކިފަރާތްތަކާ ބެހޭގޮތުން ބުހުތާން ދޮގު މަޢުލޫމާތު ފަތުރައި ، މީހުންގެ އަބުރަށް އަރައިގަނެ ، މުޖުތަމަޢުގެ ޢާންމު މަޞްލަޙަތު ނަގާލަން އޮންނަ ހަތިޔާރެއް ނޫނެވެ.
މިކުންފުނިން ، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑް ކޮމްޕެނީއަށް ބަދަލުކުރާ މުއައްޒަފުންގެ ލިސްޓެއް ތައްޔާރު ކުރަމުންދާ ވާހަކަ މިދެންނެވި އޮންލައިން ދެނޫހުގައި ޖަހާފައި ވެއެވެ. މިއީ ޙަޤީޤަތާ ޚިލާފު ދޮގު މަޢުލޫމާތެކެވެ. މިކުންފުނީގެ މެނޭޖްމަންޓުން އެފަދަ ލިސްޓެއް ތައްޔާރެއް ނުކުރެއެވެ. އަދި ، އެފަދަ ލިސްޓަކާ ބެހޭގޮތުން އެއްވެސް ފަރާތަކާއެކު މަޝްވަރާކުރެވި ، އެފަދަ ވާހަކައެއްވެސް ދެއްކިފައެއް ނުވެއެވެ. މިކަމާގުޅިގެން އެގްރޯނެޓްގެ މުއައްޒަފުންގެ މެދުގައި ކަންބޮޑުވުން އުފެދި ، ތަނުގެ މަޞްލަޙަތަށް ބުރޫއަރަމުން އެބަދެއެވެ.
އެހެންކަމުން ، އެގްރޯނެޓްގެ ޢާންމު މަޞްލަހަތާއި ، މުއައްޒަފުންގެ ވިސްނުމަށް ނޭދެވޭ އަސަރުކުރާގޮތަށް ، މިކުންފުނީގެ އިސް ދެމުއައްޒަފެއްގެ ބައިވެރިވުމާއެކީ ، މަތީގައި ދެންނެވި އޮންލައިން ދެނޫހުގައި ޖަހާފައިވާ ވާހަކަތައް ދޮގުކޮށް ، އެކަން ، އެންމެ ހަރުކަށި ޢިބާރާތުން ކުށްވެރި ކުރަމެވެ.
29 ޑިސެމްބަރ 2024
